Bob
Filmari buruzko informazioa
Jatorrizko izenburua: Bob
Iraupena: 3 min.
Zuzendaria: Jacob Frey & Harry Fast
Jatorrizko herrialdea: Alemania, 2009
Hizkuntza: Ingelesa
Gomendatutako adina: 11-14 urte
Laburpena
Hamster bati bere adiskidea gustatu zaio eta haren bihotza bereganatzeko edozer egiteko prest dago... baita mundu osoan zehar haren atzetik joateko ere. Baina ezusteko handi batekin egingo du topo...
Gai nagusiak
Estereotipoak
Genero espektatibak
Senari jarraitzea
Norberak homosexuala dela adieraztea (armairutik ateratzea)
Beste norbait homosexuala dela agerian jartzea (armairutik ateraraztea)
BOB izeneko pelikulan, ingurune desberdinetan elkarren atzetik ibiltzearen kontzeptua irudi engainagarria da, trikimailu bisual hutsa. Kameraren ikuspuntuaren ondorioz, bidaia-agentzia bateko posterretako irudiek ekintza garatzen den benetako tokia ematen dute. Engainagarria den ikuspuntu hori zenbait ariketa egiteko abiapuntua izan daiteke:
1. ariketa: Atzealdeak
Atzealdeak eta perspektibak aztertzea ariketak egiteko abiapuntu dibertigarria izan daiteke. Ariketa hau gauzatzeko, irudiak proiektatu behar ditugu pantaila handi batean edo paretan. Horretarako, proiekzio-kanoia daukan ordenagailua, diapositibak edo erretroproiektorea erabil daitezke.
5 paisaia desberdin erakusten dituzten diapositibak erabiliz, hauxe egin daiteke:
- Irudien koloretako kopiak banatu, bat ikasle bakoitzari. Ikasleek ez diete ikaskideei euren irudia erakutsi behar. Eskatu iezaiozu ikasle bakoitzari bere irudian agertzen den paisaia deskriba dezala, xehetasun askorik gabe, inpresio orokorra emanez. Ondoren, sar itzazu irudi guztiak kutxa batean.
- Ikasle batek irudi bat aterako du kutxatik. Orduan, irudi hori denontzat proiektatuko da pantailan. Ikasleek banan-banan eta ozenki irakurriko dute lehen egin duten deskribapena. Deskribapena pantailan proiektatuta dagoen irudiarekin bat dator? Ikasleak gai al dira deskribapen bakoitza zein irudiri dagokion esateko? Uneren batean, efektu barregarririk sortu al da? (Zenbat eta muturrekoagoa izan hautatutako irudia, orduan eta errazago sor daiteke efektu barregarria).
- Idatz ezazu berri baten gaineko testu neutroa, testuinguruan gehiegi sakondu barik. Ez aipatu leku zehatza, tonu orokor samarrean idatzi. Adibidez, “Pertsona asko bildu ziren horren kontra protesta egiteko...” edo “Testuinguru historikoa kontzentrazio baketsu baten atze-oihal bikaina izan zen...”. Ikasleek testua ozenki irakurri behar dute, zutik, diapositiben aurrean. Irudian agertzen den tokiak berriaren interpretazioa aldatzen du? Nola? Efektu barregarria dauka?
- Ikasleek oporretan joateko lekurik gogokoenaren argazki bat ekarriko dute. Izan daiteke benetan oporretan egon direlako ezagutzen duten leku bat edo etorkizunean ezagutu nahi duten leku bat. Zutik, pantailan proiektatutako argazkiaren aurrean, paisaia nolakoa den azaldu behar dute, bai eta zergatik iruditzen zaien bereziki erakargarria ere. Animatu itzazu atzealdea modu sortzailean erabiltzen, euren azalpenaren barruan.
2. ariketa: Perspektiba I
Film horretan jendea engainatzeko erabili da perspektiba. Ikusi filma berriro eta hau bilatu ezazu:
- eszenatoki zuzena zein zen ulertu zenuen une zehatza.
- gauza ezinezkoak perspektibaren erabilerari dagokionez (hala nola, zinta haitz baten aurka estropezu egiten, e.a.)
- Bob filmean erabili diren irudi turistikoetan kontzentratu.
- Zer leku ikusten dira?
- Zein herrialdetan?
- Zein kontinentetan?
- Zuk nora joan nahiago zenuke?
3. ariketa: Perspektiba II
Denok ezagutzen dugu oporretan atera ohi den argazki tipikoa, perspektiba jakin bati esker efektu barregarria lortzen duena (esaterako, turista bat lehen planoan, atzealdean dagoen Pisa dorrearen kontra jarrita, edo norbait Eiffel dorrearen puntaren gainean eskua jarrita).
- Bila ditzakete ikasleek horrelako engainu bisualeko efektuak (amarruak) dituzten argazkiak Interneten?
Perspektiba aldaketa batek egoera baten ikuspuntu guztiz desberdina eman dezake. Hona hemen adibide historiko ospetsu bat: a) gizon bat lehen planoan, espaloian dagoen emakume bat bortizki bultzatzen b) urrutitik ikusita, konturatuko gara gizona emakumea bultzatzen ari dela leiho batetik erortzen ari den objektu pisutsuak zanpa dezakeelako.
Gai dira ikasleak antzerako eszenatokiak bilatzeko, zeinetan perspektiba zabalago batek irudian erakusten den emozioaren interpretazioa aldatzen duen? Saia zaitez emozioen dualtasuna azpimarratzen (minagatik negar egitea -> pozagatik negar egitea; beldurragatik oihukatzea -> emozioagatik oihukatzea...).
Aukeratu ideiarik onenak eta eskatu ikasleei kamera erabil dezaten argazki horiek egiteko.
4. ariketa: Imajinatu… Animazioa edo film erreala?
Guztia posible da animazioko film batean. Ideiarik zoroenak ere pantailan bistaratu daitezke. Baina, zer gertatzen da film batean aktoreek egoera jakin batzuk antzeztu behar dituztenean?
BOB film erreal gisa filmatu beharko balitz, zer egin liteke eta zer ez? (hamsterren ordez, gizakiak jartzeaz gain)
5. ariketa: Sexuak antzeman
Bob film lehen aldiz ikustean, argi eta garbi emetzat jotzen dugu. Geroago, zalantzarik gabe artzat hartzen dugu.
Zertan oinarritzen gara pertsona baten sexua bereizteko? Zergatik nahasten gara hain gutxitan -filmeko hamsterra ez bezala-? Benetan ba al dakigu ez gaudela oker?
Saiatu alderatzen Boben jokaera filmaren hasieran eta amaieran.
Zerk desberdintzen ditu bi pertsonaiak? Zertan desberdintzen da haien gorputz-hizkuntza, jokatzeko modua, jarrerak, itxura? Ikusi arretaz ezaugarri fisikoak, adibidez, bularra, kokotsa, begiak, etab.).
Ohartu zara errealizadoreak noiz aldatu duen sexua (emetik arrera)? Nola egin du?
Normalean nola antzeman dezakegu hain erraz ezagutzen ditugun pertsonen sexua? Haurrek ere txiki-txikitatik desberdin marrazten dituzte mutilak eta neskak. Nolatan egiten dute hori?
Marraztu orri baten goiko aldean “arrautza” ilara bat: aurpegiak, beste ezaugarririk gabe. Banatu ikasleen artean “arrautza” horiek dituzten orri batzuk.
- Eskatu ikasleei binaka lan egin dezatela. Bikote bakoitzeko kide batek aurpegia marraztuko du 3 “arrautzatan”. Nola adierazten dute neskak ala mutilak direla? Bikoteko beste kideak argi eta garbi identifika al ditzake bere lagunak marraztutako pertsonaien sexuak? Marrazkilariak aldatu al dezake marraztu duen pertsonaiaren sexua arkatzez egindako hainbat lerrorekin? Nola bihurtu mutil bat neska eta alderantziz?
- Gorputzekin gauza bera egin al daiteke? Nola desberdintzen da mutilaren gorputza eta neskarena? Gerriagatik, aldakengatik, hankengatik? Eta zer gertatzen da benetako bizitzan?
Alderatu mutilen gorputzaren formak eta nesken gorputzaren formak, bigarren mailako elementu sexualak bakarrik kontuan hartuta. - Orain arropa eta osagarriak erabil ditzakete gorputzak emakume edo gizon bihurtzeko. Zer ezaugarri erabiltzen dira mutilentzat eta neskentzat? Egin zerrenda bat erabilitako ezaugarriak hartuta. Benetan osagarri tipikoak dira? Hitz egin hautatutako estereotipoen gainean.
Eztabaida: Arrazoi biologikoak daude azaltzeko buruak ez digula huts egingo beste pertsona baten sexua antzematerakoan. Azter al dezakete ikasleek zergatik funtzionatzen duten horrela geure buruek?
Klaseko norbait inoiz nahastu al dute kontrako sexua duen norbaitekin? Jo al dute mutilen bat neskatzat edo alderantziz? Nola sentitu da nahastua izan den pertsona? Gauza bera al da mutilentzat eta neskentzat? Errazago onartzen da itxura maskulinoa duen neska bat mutil maritxu bat baino?
